【丹尼60】天之驕子陳百強的最後歲月 陳家瑛：一啖香檳一粒安眠藥

By 余燕儀🍎

長夜空虛使我懷舊事！

今日是陳百強（Danny）60歲冥壽，Danny走了25年，有說人走茶涼，但在經理人陳家瑛的心中，陳百強一直沒離開過，兩人情同姐弟，Danny生前對她比母親更依賴！

「佢係我做經理人第一個合作藝人，差唔多30年前，我喺富才（製作公司）同佢做紅館演唱會，點知開騷前打風，紅館漏水，演唱會臨時決定延後一個禮拜，嗰時演唱會唔係太多，變咗對artist嚟講係好大打擊，不過佢好好，完全好鎮定：『唔緊要，冇問題！』我已經覺得，畀着其他artists會好慌張，佢一啲都冇；之後我哋變咗朋友，成日傾電話，佢係一個幾冷靜嘅人，睇得遠，唔會好毛毛躁躁，幾有教養小朋友。」陳家瑛回首前塵往事。

其後Danny找陳家瑛做經理人，原來跟張國榮有關：「當時應該係（陳）淑芬湊緊張國榮，佢哋幾個細路哥喺唱歌事業有競爭，佢覺得好似自己一個人，冇人幫佢，佢要我幫佢嘅事業，我咪做咗佢經理人。」兩人在工作上緊密合作，變成了親密戰友，跟家人緣薄的Danny，更視陳家瑛如姐姐般依賴：「記得佢晚晚食飯要見到我，佢生活好有規律，起身食lunch，下午錄音，傍晚要拉埋我去食飯，然後返去作曲、彈琴，夜晚就去玩。」

天生有貴族氣質的Danny，要求身邊人都要有品味，陳家瑛笑說：「嗰陣時我靠佢搵食好淒涼，因為佢唔係好做嘢，我靠佢份糧餓死都唔得掂，所以我去亞洲電視做嘢，嗰排佢好唔開心，因為我夜晚唔得閒陪佢，有時得閒陪佢去甚麼ball，下面着『白飯魚』，佢叫我即刻返去換高踭鞋，你知有時電視台跑出嚟，換到件衫都換唔到對鞋啦，佢就係咁嘅人。」

在陳家瑛的眼中，Danny的好數之不盡：「佢屬狗，所以個人好忠心，好善良，就算做善事唔會周街話畀人知，每年聖誕都要我同佢去孤兒院送嘢，因為我識揸車做埋司機，有啲好山卡拉新界孤兒院，好窮，唔係好出名嘅保良局，有一兩年我哋去咗見到有個BB冇晒手腳，Danny特別錫佢，買啲糖包晒禮物仔，來回路程差唔多三個鐘。我哋成日話，我哋好似貓狗流浪記，我屬老虎，佢屬狗，去每一處地方登台，我哋都好鍾意睇月光，諗番幾多溫馨事件，譬如我覺得佢做錯嘢會鬧佢，嗰時我火氣都大，佢同我駁嘴駁舌，我冚佢電話，佢成晚一個鐘打一次畀你，一定要搞到你開心唔再嬲。」

性格孤傲的Danny，卻很聽陳家瑛的說話，她笑說：「可以順得佢意，又可以做經理人，又要做阿四，連服裝都要做埋，我鍾意着鬆鬆地男仔頭衫，有次佢攞獎，叫我剝衫，攞咗我件衫着上台，咁我冇衫點，佢叫我去厠所匿埋先，佢係貪靚到咁嘅程度。我又做埋秘書、司機、保母，一百個身份，因為我仲要返電視工，有時佢頂我唔住，話：『不如咁，我借100萬畀你，你不如辭咗份工。』我話借唔係送畀我，容乜易抽起條筋叫我還，我又失咗業...有時我哋有啲咁樣笑話。」

兩人情同姐弟無所不談，Danny甚至跟陳家瑛比媽咪更親近：「佢真係好錫我，我唔係要擁有佢；佢打畀我：『今日好想食牛腩。』我喺九龍住，佢住香港，我喺九龍買靚牛腩河上佢屋企，點知佢阿媽煮咗好多餸，佢又唔同阿媽溝通，佢唔肯食阿媽啲餸，佢媽咪發脾氣呷我醋；佢屋企團年食飯叫佢返去，佢家姐、哥哥好錫佢，但佢唔想，因為佢媽咪叫佢，佢唔理，佢媽咪打畀我，叫我押佢返去食飯，我真係尷尬，陳家人我夾中間陪食。其實佢好錫媽咪，唔知係咪八字唔夾，我都唔係好明！佢爸爸係生意人，唔多時間陪仔女，佢自細脾氣咁怪，可能哥哥家姐想同佢傾多啲，但佢都唔想同人講嘢，有啲咁嘅怪癖。」

「人潮內一再凝望 令我全身觸電了

我已遇著我欣賞的眼光」

－－陳百強《凝望》

陳百強的感情世界好神秘，有傳初戀女友是翁靜晶，但翁靜晶去年接受🍎訪問，卻澄清Danny從沒追求她：「我哋感情好單純，大家話題都係食乜嘢、睇乜戲，聽乜歌。」在他35歲的短暫人生中，從沒有一位公開女友！

原來，Danny曾暗戀一位意大利籍女仔，陳家瑛說：「佢成日喺度呻冇愛情！佢試過鍾意一個女仔，意大利妹，喺蘭桂坊做侍應，佢晚晚坐喺度等，但又怕醜，唔識得約人去街，跟住發覺酒保係嗰個女仔男朋友，佢話自己失戀，好sad，走去買咗架車氹自己開心，改架車個名就係女仔嘅名。佢最鍾意嘅歌叫《凝望》，發現女仔有男朋友，返去作咗呢首歌，好淒涼！」

雖然Danny跟何超瓊曾傳緋聞，但陳家瑛說：「佢哋係好好朋友，好純情，成日傾偈傾到天光。佢好多朋友，男又有女又有，但唔係可以黐到埋身，因為佢唔係好容易同人喺埋一齊。」愛情對Danny重要嗎？她說：「我諗佢對多方面嘅愛都覺得重要，愛情、友情、親情，都畀佢溫暖感覺。」

Danny的愛情世界空虛，但他對認定的朋友很好很好，陳家瑛說：「可能同我夾到，因為我畀種大姐姐、錫佢呵佢，聽佢傾偈，所以投到緣。佢想旅行，但一個人又驚，佢話請我機票，叫我請酒店，我笑佢識計數；林燕妮（Eunice）係佢好朋友，非常錫Danny仔，嗰時Eunice同黃霑分手唔開心，成日喺屋企自閉，Danny仔特登請Eunice去美國玩，佢好錫朋友，Eunice走之前都同我講，仲係好掛住Danny仔！佢唔自私，幫得就幫，圈外朋友金錢上搵佢幫手，佢攞出嚟冇預攞得番，對朋友好仗義，一啲都唔虛偽，佢好信佛教，一隻蚊都唔會殺死，好善良。」

問到Danny一生中最開心是甚麼事？陳家瑛想了想說：「佢攞獎又冇乜感覺，演唱會又冇好大感覺，佢食嘢好挑剔，同朋友玩最開心，有次去紐約同周潤發、紅姑拍《秋天的童話》，佢好開心，因為發哥錫住佢，成crew人好開心！但佢唔開心嘅時間佔大多數，佢基本上唔係一個開心嘅人，唔知佢長大係咪有乜壓力，總之唔係一個喜怒形於色嘅人，表情cool cool哋。就算好紅嗰段時間，佢成日話畀我聽唔想出街，因為出到去好多人，啲人叫：『陳百強，影張相。』佢唔識得同歌迷close！」

「心中想你 如今想你 懷念昨天的你

懷念著你 懷念著你 紅著淚眼在記起」

－－陳百強《深愛着你》

樣子俊朗、氣質高貴又有音樂才華的陳百強，78年參加山葉電子琴大賽獲高級組冠軍，21歲加入樂壇，憑處男專輯《眼淚為你流》一炮而紅；入行13年，Danny的金曲數之不盡，《偏偏喜歡你》、《漣漪》、《深愛着你》、《幾分鐘的約會》、《念親恩》、《煙雨淒迷》、《一生何求》等，迷倒萬千粉絲，惟後期卻經歷高山低谷，性格憂鬱的Danny作繭自縛，日子過得不開心，他的最後歲月在沉鬱中度過，92年5月18日昏迷入院，93年10月25日英年早逝，結束35歲璀璨一生！

經理人陳家瑛跟陳百強情如姐弟，眼看他起高樓，眼看他樓塌了，陪他走過最後歲月！才華洋溢的Danny，對自己要求很高， 給自己很大壓力，陳家瑛說：「佢太過完美主義，因為佢處女座，所以好挑剔，要唱到最好，唔係挑戰人，係挑戰自己，所以佢好辛苦！」有說當年Danny跟張國榮競爭激烈，後來哥哥紅遍半邊天，Danny變得鬱鬱不得志！陳家瑛代Danny剖白：「佢唔嬲哥哥㗎，哥哥都唔嬲佢，佢冇呻過，各有各做嘢，只不過佢睇到報紙人哋攻擊佢，佢有啲唔開心，佢同哥哥私底下唔可以話係好朋友，做唔到好朋友，但見到面都會拍下你膊頭。點解做唔到好朋友？事業競爭囉。」

當年Danny沒有妒忌哥哥，只是出不出困局，陳家瑛說：「當時四大天王未出嚟，但佢已經知，佢話下一個朝代應該係四大天王，之後佢喺好不安情緒，同埋發覺自己創作力越嚟越弱，對住個琴成個禮拜都彈得好辛苦，舊時佢好有信心，後來佢情緒病，因為佢覺得後浪嚟得好快，佢亦都可能乾塘，音樂對佢好緊要，朝早起身開音樂，夜晚都係開音樂，點解自己作唔到歌呢，越忟越急。」

Danny的最後歲月很不開心，試過飲一啖香檳，食一粒安眠藥，然後致電陳家瑛！她嘆說：「呢啲佢嚇我哋啫，要畀人感覺佢到唔開心，如果你真係想唔喺度，唔會打電話畀人知，我丟底所有做嘢去佢屋企，佢話飲咗一支香檳，食咗十粒八粒，我啲佢去洗胃！佢要你注意佢，要身邊朋友注意佢，後來佢連作曲、宣傳都唔做，好似小孩子同你鬥氣，呢樣係佢走唔出嚟嘅地方！佢好down，成日困自己喺屋企，夜晚同出面朋友去玩，我收工駕車搵佢，陪佢飲一兩杯，佢又唔係借酒澆愁，基本上鍾意飲酒，好似我咁，佢一定要飲香檳，仲要指定牌子。」

92年5月18日，Danny昏迷入院，陳家瑛黯然地說：「佢出事時我做緊嘢，佢阿媽打畀我，話佢真係唔得，我即刻標過去，我見佢面色唔對路，好似冇乜呼吸咁，佢媽咪話：救佢！救佢！之後佢昏迷咗，我都有同佢講嘢，有時感覺佢隻手郁緊，大家好緊張：快啲按摩！但可能只係神經反射。」

93年10月25日，Danny離開的一天，陳家瑛慨嘆：「永遠記得佢走嗰日，我喺泰國同Danny祈福，希望佢快啲醒，因為佢咁鍾意靚，唔鍾意自己個樣咁唔靚。唔知點解，我落飛機會冇情白事打畀黃柏高，佢話：『唔掂啦，你快啲嚟醫院，個個都嚟同佢拜拜，只係淨你，佢死都唔斷氣，佢唔肯斷氣！』我去咗泰國三日，佢就自己放棄，可能見所有朋友嚟咗睇佢，同佢say bye bye，只係淨我，黃柏高叫我快啲嚟醫院，我話唔好，當時我心情麻痺咗，返咗屋企，飲咗成支拿破崙XO，我先去醫院，我接受唔到佢會斷氣！」

回家飲了一支XO後，陳家瑛才有勇氣到醫院：「我入醫院嗰下，未上到佢，佢走咗，幾sad，我諗佢feel到我喺度。」雖然見不到最後一面，但她不覺有遺憾：「你錫一個人，希望佢安落舒服平安，唔會希望佢日日都唔開心，日日都苦惱。佢瞓得好舒服，雖然走咗，但一生活得好精彩，雖然係好短，好過夾硬拖長生命，佢最緊張靚，你諗下，如果佢依家60歲，又肥咗，好似阿伯，佢咁緊張形象，喺黃金時間走咗，唔係一個問題，喺我心裏面，佢永遠都喺度，唔使睇住佢變老。」

最後，陳家瑛笑着說：「佢常在心，我冇眼淚，已經喊唔出！唔緊要，成枱麻雀有突，佢啲friend喺晒上面，唔使擔心！」