大家长远弗见，我是雪螢。
年初个辰光，我闲来无事叻嗨浏览某个网站时，一个熟悉个名字曾经突然跳入我个视线。归个时刻起我意识到，假使自家再着力点，阿会弗会得有朝一日「雪螢」搿个名字也会得出现叻归个年轻人间蛮流行个百科网站哴向，或者拥有一页专门介绍搿个人是啥人个百科网页，或者叻嗨某个词条下个「创作人」一栏露个面。于是搿个辰光个我叻嗨Bilibili动态里向立下一个目标：
今年之内，「雪螢」搿个名字也要得登上搿个网站！
不知搿算弗算「年少轻狂」，算弗算「意气风发」。
现在想来，归个辰光个我作兴仅仅是想做一个梦，而梦一醒即碎，就算呒人刻意淡忘，自家也会得散去个。今朝个我所做到个一切，侪已经超过仔归个夜里向叻嗨台子边畅想未来个少年个预料，但不过当我叻今夜坐叻嗨同一只台子前面点落笔，却恍惚间一如归个辰光个我，从朆变过。
我呐哼选择仔做名词作？亦为啥咾选择仔做名吴语up主？最初个想法已难以查证，但时至今日，我原旧追慕梦中归个古国永弗逝去个名士，折服于俚笃个才思，更钦佩于俚笃个品行。俚笃作兴一袭褴褛却朆折志，俚笃作兴千夫所指原是一意孤行；俚笃身哴总归有种弗畏峰高个勇气，亦总归有个但济天下弗问穷达个侠心。
彼时归个连混音是啥侪弄弗清爽个小倌，纯粹，青葱，但不过俚选择立下仔搿个曾经弗敢想象个目标——即使俚作兴只不过为仔鼓励自家；也开始望搿个目标切实介一步步前行——即使俚还不晓得搿一日几时再到来。
————————
「身寄江南外，微漪泛独舟。
始逢同叙客，终喟共情秋。
字句留风骨，心神映鹭鸥。
山川依旧是，泼墨画沉浮。」
犹记得搿个是去年今日自作主张与一位欢喜煞个先生相和个次韵诗。如今一年过去哉，我搭现实或网络个老师、朋友各自经历良多，各有各个悲喜，各生各个沧桑。
江湖从未行远，即使变仔副腔调。但不过Cyberpunk风个江湖总归更世事无常。与其如儿女沾巾忸怩作态，不如叻嗨曲终人散个时刻磊落个道别，然后转身离去弗再回首，只留下一段故事、几行文字、一页呒人读着个历史、一篇未载于册个春秋。
闻说日本茶道中有叻嗨「一期一会」个讲法：对一生只会得见一面个客人家，诚心礼遇，竭诚相待，然后就相忘于江湖。作兴是美好本就是应该短暂个，亦作兴只不过是人沧海一粟煞哉，甚至总归呒不办法左右自家个人生。
我几乎朆做出承诺过，尤其是叻嗨网络哴向：明朝与意外倷弗会得晓得哪个来先。搿方江湖哴，故事总会得有个终点，有时是叻完美个谢幕之后，但更多个是叻某个分号或问号后畀草草画上一个句号就收场。江湖中个我伲总是身不由己，纵使一时得意或失意，也难有幸决定自家个结局。
「雪螢」，搿个名字也一样。
但不过我朆因此而失落，至少朆因此踟蹰不前。江湖哴向有穷多个匆匆过客，作兴俚笃搭伲只是擦肩而过个交情，但我原是会得竭尽所能写好笔下个每一个字，调好手中个每一个音。我个能力有限，作品也总有不少瑕疵，搿末我就继续学习，不断精进自家个水平。与每一名老师个合作，我侪倍感荣幸；与每一位唔笃个相遇，我侪倍加珍惜。
同样个，名叫「雪螢」个故事，也终会得迎来自家个结局。
————————
「箇篇遲到个年終報告，寫畀吾自家。願倷步過山水，歸來仍弗負韶華。」
去年搿个辰光，我用搿句闲话，画上仔2022年个句号。
如今个我还叻嗨山水间跋涉。我有仔更高个吴语水平与更精个拟音技巧，有仔搭仰慕个老师合作个机会，有仔播放量四十多万个作品，有仔突破千粉搿个小里程碑。对我个人而言，2023年，我有仔弗小个进步与收获。至于拿「雪螢」刻上归个百科网站个原定目标，呣……《占卜少女的守则》个词条里向浅浅提到仔一笔，实叻……也算？
朆晓得去年今日坐叻嗨搿只台子前面点个我，会呐哼看待如今我交出个搿个答卷。是惊喜意外，平静处之，还是轻轻叹息、接受遗憾？
山水间个脚步弗会得就此停歇，唯有搿一点我深信不疑。往后个漫漫长路哴还会得有交关风霜雨雪，但无论是俚笃还是山川景色、绯霞星空，侪值得我驻足。搿个景仰叻嗨名士勇气与侠心个少年，搿个想试一试笔锋助一助吴语个少年，搿个叻台子前面点立下仔目标个少年，朆变过，也还弗愿改变。
同样个，名叫「雪螢」个故事，也还远未迎来自家个结局。
搿篇年终报告，写畀改变叻嗨也从朆变过个自家，写畀曾经或即将与我相遇个唔笃。愿日月相照，前路长明，任尔我偕行。
————————
2023年一共投稿54次，视频43次，专栏11次（另有2个无关视频朆算在内），可以讲是投稿井喷个一年。
首先是《吳語常用詞彙一》。搿个专栏投稿后已经更新数十次，并将叻嗨未来继续更新下去。
其次是去年年终报告中着重提到个「未定a」音系——现在已更名为「中州语」人造音系。搿个音系一直叻嗨更新，但不过由于还弗够成熟呒不向《詞彙一》搿场叻B站实时更新，同时暂时呒不创作新个该音系歌曲个打算。
《人造天使》和《占卜少女个守则》完成于21-22年，由于成曲较晚一直等到23年初再投稿。《为我》《江心客》等大抵是22年末到23年初个作品。至于其他个吴语歌词则是基于原词个翻译，并弗能算作是我写个词。总体哴讲，搿一年我主要创作吴语歌曲与多语言翻唱作品，词作个老行当倒是有点顾及不上哉。
以下列举部分视频投稿。
3月19日，洛天依版本《一梦惊鸿》投稿。搿个是我叻嗨《忆红莲》吴语版之前调得最满意个一首作品，俚个播放量虽然不算高，但不过还是搭我个吴语创作带来仔顶大个自信，让我更有勇气用吴语继续创作作品。但另一方面，这首歌现在看来叻拟音哴向问题颇多，搿星问题大多叻嗨《忆红莲》及其后我个归搿场星吴语歌曲中畀纠正哉。因此，该曲反映个拟音、调教水平与我现在个新作品有较大差距。
3月24日，洛天依翻唱版《妄语人间》投稿。搿个是我调得比较满意个一只国语歌曲。
3月25日，《占卜少女的守则》现版本投稿。搿只歌很好听，我也自以为写词写得蛮尽兴。
3月26日，多语版《千本樱》投稿。搿个是我搭仔汉字文化圈个先生合作个第一弹，也是「梦开始个场许」。
3月31日，重制个多语版《吹梦到西洲》投稿。能够重制搿个版本是我个荣幸，也算是我对语言学圈归位先生个一种怀念罢。
4月21日，洛天依吴语《アイドル/偶像》投稿。由于辰光仓促只投稿仔短版，短时间内应该弗会得有完整版哉。
5月26日，洛天依吴语《忆红莲》投稿。搿只歌标志我叻嗨吴语拟音哴向技术已相对成熟。但不过混音哴还留有一点遗憾。
6月17日，多语版《神のまにまに》投稿。是一部叻嗨多语拟音哴有仔一定进步个作品。此外还有重制版个投稿，但音频呒不变化。
8月5日，洛天依吴语《梦倾天下》投稿。由于准备仓促，实际版本出现仔弗少字音疏误，是一部瑕疵较多个作品。但总体哴还是好听个。
8月18日，吴闽双语《红尘寄雪》投稿。搿只歌是与@拿破仑白克P先生个合作，孛相得开心煞。以后还要得搭拿白阿姐贴贴。拿白，嗨嗨，拿白~~~
混音哴还有一点弗足。搿个也是我一如既往个问题。增进混音技术个长路迢迢，我原需努力。
9月29日，言和吴语《藏字馆》投稿。得到仔原创曲先生个支持与帮助，非常感谢。特别感谢@北山薇、@Blood_K血鉀、@Mu_青（无先后）先生。
10月1日，多语言版《Bad apple!!》投稿。截至12月28日，已累计40余万播放量并畀收录于东方频道精选。搿个是汉字文化圈创作者们反响最好个作品之一，畀我伲穷大个鼓励。
10月23日，洛天依吴语《剑与雪》投稿。过渡段调得并弗好，副歌部分倒是蛮弗差个。
11月18日，洛天依吴语《轻涟》投稿。感谢@夜风如水沁凉、@储君个师侄、@登州薛氏先生个配音搭帮助。
12月8日，洛天依吴语《不直白动物》重制版投稿。相较于数月前个《一梦惊鸿》叻嗨拟音哴向有仔交关进步。
————————
过去一年个投稿，可以看得来进步，可以看得来遗憾。但不过属于雪螢个历史还叻嗨书写，与其纠结过往，不如放眼明日。
以上，是我对雪螢2023年个总结。
